Haustúthlutun
17 December 2012
27. nóvember var úthlutað 6,5 milljónum til hönnuða og hönnunarverkefna. Hönnunarsjóður Auroru hefur þá úthlutað alls 17 milljónum til hönnuða og hönnunarverkefna á árinu 2012.
Hjá sjóðnum er lögð áhersla á að styðja verkefni þar sem hönnuðir hafa skýra sýn og markmið. Í þessari úthlutun má greina áherslu hönnuða á mikilvægi rannsóknarvinnu við undirbúning verkefna sinna. Það er fulltrúum sjóðsins sönn ánægja að geta veitt hönnuðum næði til að kafa á aukið dýpi í rannsóknarvinnu sinni sem er einn mikilvægasti þáttur hönnunarferlisins og forsenda góðrar útkomu.
Þeir hönnuðir og hönnunarverkefni sem að þessu sinni hljóta styrk eru:
Fathönnunarverkefnið Ostwald Helgason (1.5 milljón)
Ingvar Helgason og Susanne Ostwald fatahönnuðir, fyrir frekari þróun og markaðsstarf fyrir fatalinun sína og þátttöku í tískuvikunni í New York í maí 2013.
Spark Design Space (1.2 milljón)
Fyrir gerð kynningarefnis um hönnun og hönnuði sem sýnt hafa í galleríinu.
Vöruhönnunarverkefnið Textasíða (1.2 milljón)
Snæfríð Þorsteins og Hildigunnur Gunnarsdótir vöru- og grafískir hönnuðir, fyrir frekari vöruþróun og undirbúning verkefnisins Textasíður fyrir fjöldaframleiðslu.
Rannsóknar og hönnunarverkefni byggt á ævistarfi Gísla B. Björnssonar (1.2 milljón)
Ármann Agnarsson grafískur hönnuður, fyrir rannsóknar og hönnunarverkefni byggt á ævistarfi grafíska hönnuðarins Gísla B. Björnssonar í tengslum við uppsetningu sýningar sem nú stendur yfir í Hönnunarsafni Íslands.
Arkitektúr, bókverk (750 þúsund)
Guðni Valberg arkitekt og Anna Dröfn Magnúsdóttir sagnfræðingur, fyrir rannsóknar- og hönnunarverkefni vegna undirbúnings að gerð bókar um sögu hönnunar og staðarvals margra helstu bygginga í Reykjavíkurborg.
Guðrún Eysteinsdóttir textílhönnuður (500 þúsund)
Styrkur til starfsnáms hjá Center for Advanced Textiles (CAT) í Glasgow, Skotlandi.
Hildigunnur Sigurðardóttir fatahönnuður (500 þúsund)
Styrkur til starfsnáms hjá fatahönnuðinum Roland Mouret í London.
Um er að ræða aðra úthlutun úr sjóðnum á þessu ári, en þá níundu frá því Hönnunarsjóðurinn hóf starfsemi sína í byrjun árs 2009. Aftur verður úthlutað úr sjóðnum á vormánuðum 2013.
10 milljónir til hönnuða - vorúthlutun 2012
31 May 2012
Fréttatilkynning 31.maí 2012
Hönnunarsjóður Auroru úthlutaði nú rétt í þessu tíu milljónum króna til hönnunarverkefna og er áherslan að þessu sinni mest á fatahönnun.
Sjóðurinn hefur leitast við að styrkja framúrskarandi hönnuði með heilsteyptar viðskiptahugmyndir og skýra framtíðarsýn. Að þessu sinni bárust um 80 umsóknir af öllum sviðum hönnunar og báru umsóknirnar þess merki að mikil gróska og framþróun er að eiga sér stað á sviði hönnunar á Íslandi.
Þeir hönnuðir sem að þessu sinni fá styrk eru:
Fatalínan Ostwald Helgason (2 milljónir)
Ingvar Helgason og Susanne Ostwald, fatahönnuðir fyrir þátttöku í tískuvikunni í New York í september 2012.
Fatalínan EYGLO (1.8 milljón)
Eygló Margrét Lárusdóttir, fatahönnuður fyrir áframhaldandi vöruþróun og markaðssókn erlendis.
Barnafatalínan As we grow (1.8 milljón)
María Ólafsdóttir, Guðrún Ragna Sigurjónsdóttir og Gréta Hlöðversdóttir fyrir kynningu og markaðssetningu erlendis.
Vöruhönnuðurinn Brynjar Sigurðarson með Húsgögn (1.5 milljón)
Brynjar Sigurðarson, vöruhönnuður fyrir frekari vöruþróun m.a. vegna sýningar í Galleri Kreo, París.
Krads arkitektar vinnustofan PLAYTIME (1.2 milljón)
Til frekari þróunar á vinnustofu fyrir arkitektanema, hérlendis og erlendis, í samstarfi við hinn heimsfræga arkitekt Viny Maas, LEGO ofl. Vinnustofurnar virkja sköpunargleði, skipulagshæfni og rýmisgreind þátttakenda.
Valgerður Pétursdóttir, starfsnám hjá AUGE (500 þúsund)
Starfsnám í listrænni stjórnun og grafískri hönnun hja AUGE, Ítalíu.
HönnunarMars – erlent kynningarefni og blogg (1.2 milljón)
Áframhaldandi samstarf vegna uppbyggingar HönnunarMars hátíðarinnar og kynningar á íslenskri hönnun erlendis.
Um er að ræða fyrstu úthlutun úr sjóðnum á þessu ári, en þá áttundu frá því Hönnunarsjóðurinn hóf starfsemi sína í byrjun árs 2009. Aftur verður úthlutað úr sjóðnum á haustmánuðum 2012.
Samstarf Hönnunarsjóðsins og FORM
22 March 2012
Hönnunarsjóður Auroru stendur fyrir Hönnunarsýningunni "Best of DesignMarch so far" á HönnunarMars 2012 í samstarfi við Form, Magazine for Nordic Architecture and Design. Sýningin er svipmyndir frá þriggja ára sögu HönnunarMars, sett upp í Bankastræti 4, Aurum. (nánar um sýninguna)
úthlutun 17.nóvember 2011
18 November 2011
Hönnunarsjóður Auroru úthlutaði 6.000.000 kr. til framúrskarandi hönnuða og verkefna þeirra
fimmtudaginn 17.nóvember 2011
Alls hefur verið úthlutað úr sjóðnum rúmlega 17.500.000 króna á þessu ári. Af þessu tilefni var jafnframt tilkynnt um áframhaldandi starfsemi Hönnunarsjóðs Auroru eftir að þriggja ára tilraunatímabili hans lýkur nú í lok þessa árs en stofnandi sjóðsins, Aurora Velgerðarsjóður hefur ákveðið að veita sjóðnum brautargengi í önnur þrjú ár.
(ítarefni um úthlutunina og hönnuðina)
Reynslunni ríkari
11 November 2011
Hönnunarsjóður Auroru ásamt nokkrum styrkþegum hans miðla af reynslu sinni á tímamótum í starfsemi sjóðsins í fyrirlestraröð Hönnunarmiðstöðvar, Listasafns Reykjavíkur og Listaháskóla Íslands, fimmtudaginn 17. nóvember kl. 20 í Hafnarhúsi.
Aurora Velgerðarsjóður, stofnandi Hönnunarsjóðsins hefur veitt honum brautargengi á ný til þriggja ára. Á þessum tímamótum er við hæfi að staldra við, líta um öxl og miðla af reynslu sjóðsins og þeirra sem hlotið hafa styrki.
Fram koma:
Andrea Maack / EAU DE PARFUM Anton Kaldal, Gunnar Þ.Vilhjálmson og Steinar Farestveit / saga og
þróun bókstafsins ð, Hugrún Árnadóttir og Magni Þorsteinsson / KRON by KRONKRON, Hafsteinn Júlíusson / HAF, Sigríður Sigurjónsdóttir / SPARK, Design Space, Hlín Helga Guðlaugsdóttir / Hönnunarsjóður Auroru
Í hádeginu, þennan sama dag, fimmtudaginn 17.nóvember fer fram seinni úthlutun ársins 2011, en sú sjöunda frá því hann var stofnaður þann 13. febrúar 2009 (meira)
Úthlutun 23.mars 2011 úr Hönnunarsjóði Auroru
23 March 2011
Hönnunarsjóður Auroru úthlutaði í dag 11.580.000 kr. til hönnuða og arkitekta til verkefna á sviði grafískrar hönnunar, fatahönnunar, matarhönnunar, vöruhönnunar og arkitektúrs.
Sjóðurinn hefur leitast við að styrkja framúrskarandi hönnuði með heilsteypta viðskiptahugmynd og skýra framtíðarsýn. Að þessu sinni bárust 80 umsóknir af öllum sviðum hönnunar, sem er mesti fjöldi umsókna sem sjóðnum hefur borist hingað til. Samhliða auknum fjölda umsókna eru einnig aukin gæði þeirra merkjanleg.
Að þessu sinni fá þrír aðilar framhaldsstyrki til frekari eflingar verkefna sinna, sem er í takt við þá stefnu Hönnunarsjóðsins að fylgja eftir völdum verkefnum þannig að sá árangur megi fremur nást sem viðkomandi hönnuður stefnir að. Þetta eru þeir Bóas Kristjánsson með fatamerki sitt 8045, Hafsteinn Júlíusson með vörumerki sitt HAF og Charlie Strand með bókina Icelandic Fashion Design sem kemur út í sumar. Öll eiga þessi verkefni sameiginlegt að ötullega hefur verið unnið í þeim frá fyrri styrkveitingum.
Hönnunarsjóðurinn styrkir í fyrsta skipti Anton Kaldal, Gunnar Vilhjálmsson og Steinar Farestveit með rannsóknarverkefni sem kafar djúpt í uppruna, sögu, og þróun bókstafsins „ð“, sem er þýðingarmikill hluti af þjóðararfi Íslendinga. Rannsóknin verður tekin saman með útgáfu bókar. Arkitektastofan KRADS með verkefni sitt PLAYTIME, sem er farandvinnustofa ætluð nemum í arkitektúr, þróuð í samvinnu við danska leikfangaframleiðandann LEGO. Sruli Recht fatahönnuður með nýja herrafatalínu sína og Auður Ösp Guðmundsdóttir, Embla Vigfúsdóttir Katarina Lötzsch og Robert Peterssen með matarhönnunarverkefnið “ Pantið áhrifin” en það verkefni fékk Nýsköpunarverðlaun Forseta Íslands á dögunum.
Auk þessa tekur Hönnunarsjóður Auroru áfram þátt í uppbyggingu HönnunarMars Hönnunarmiðstöðvar Íslands og styrkir í því tilliti gerð myndbanda sem heimild um hátíðina og gerir Hönnunarmiðstöð kleift að bjóða hingað erlendum blaðamönnum.
Hönnunarsjóður Auroru hefur styrkt hönnuði til starfsnáms síðustu ár en þetta er í fyrsta skipti sem styrkirnir eru veittir til starfsnáms erlendis. Styrkina hljóta Birna Geirfinnsdóttir sem fær styrk til starfsnáms hjá Fraser Muggeridge Studio í London, sem er í eigu Fraser Muggeridge, Sarah Newitt & Stephen Barrett og Björgvin Friðgeirsson til að starfa hjá “Soup” í Kaliforniu, sem er í eigu John Bielenberg margverðlaunaðs grafísks hönnuðar.
Um er að ræða fyrstu úthlutun úr sjóðnum á þessu ári, en þá sjöttu frá því Hönnunarsjóðurinn hóf starfsemi sína í byrjun árs 2009. Aftur verður úthlutað úr sjóðnum á haustmánuðum 2011.